Sponsoren

< Biathlon Langis 16.12.2017

Helvetia Nordic Trophy Gadme 17.12.2017


Helvetia Nordic Trophy Gadme

Nach de Schuel alles packt und parat für di langi Fahrt nach Gadme. Mit em Auto vollpackt und riese Motivation für‘s Renna am Sunntig hemer üs uf de 4-e halb stündig Weg gmacht. Im Auto ischs üs aber uf kai Fall langwilig worde, NAI! D‘Ziit isch verbi gange wia am Schnürli, chum gschtartet simer scho vor üsem Hotel Alperose gschtande. Döte het üs es super z‘Nacht erwartet. Mit voll gschlagne Büch simer denn igschlofa, und als wer d‘Nacht so churz, het de Wecker am 7:15 scho wieder glütet. Nach em guete z‘Morge hemer üs denn uf de Weg gmacht uf d‘Loipe. Mier hend d’Technick und d‘Streki analysiert. Es guets z‘Mittag denn wieder im Hotel het üs Kraft ge und es isch wieder ab uf d‘Loipe gange. Mier hend üsi beschte Ski usgsuecht wo üs de Heinz den für‘s Renna no exschtra präpariert het. Danke! Nochem z‘Nacht isches sofort is Bett gange, schliesslech muess me fit sie für de Renntag. Am nöchschta Morge isch scho am 7:00 Treffpunkt gsi, mier sind mim Heinz go jogge und hend e paar Vorüebige gmacht. Jetzt simer bim z‘Morge nümm allai gsi, au anderi Skiclüb sind am Zmorgetisch gsessa und hend sech Gedanke über‘s hüttige Renna gmacht. Chum sind alli Konkurente verschwunde, hend au mier no üsi Taktike besproche und hend üs uf de Weg gmacht. Mit em super präparierte Ski hemer z‘Ilaufe schnell chöne beende. De Roman isch als erschte gschtartet und het es super Renna als 14. zrugg glait. De zwait isch de Elia gsi und hed sis super Renna als 17. beendet. De dritt isch de Gian-Luca gsi er hed au es schnells Renna chöne zruglegga und isch 2. worde. D‘Fabienne (ich) isch die nöchschti gsi und isch au z’fride mit irem Renna wo sie als 3. het chöne beende. So jetzt isch nume no de Gianluca, er het au es hammer Renna chöne zaige und isch uf de 3. Platz glofe. Noch em sehr harte Renna hemer üs es z‘Nacht im MC Donald‘s glaischtet. Jetzt wartet nur no di langi Haifahrt uf üs, aber mit chli Schlafe, Rede, Lache, Singe und Party mache isch sie schnell verbi gange.

Es isch wieder mal es mega lässes Wuchened gsi! Danke an alli wo mitcho sind und ganz fescht am Heinz, wo alles mit üs mitgmacht het! Mier freuet üs alli scho uf‘s nöchschta Renna.

Zu den Bildern: https://www.skiclubpontresina.ch/bilder/?tx_yag_pi1

Fabienne Alder